قــــصيدتي زاد بعيوني جمالها ** وأخذت انقي بالمعاني جزالها
واكتب معانيها بالشوق والغلا ** لامي وأنا اصغر شاعر من عيالها
كتبتها في غربتي يوم رحلتي ** لما طرالي بالسفر ماطرالها
أمي وأنا بوصف لها زود حبها ** وان ماحكيت لها قصيدي حكالها
أمي لها بالقلب والجوف منزله ** مكانة ماكل محبوب نالها
اقرب من ظلالي وأنا وسط غربتي ** وأنا تراي اقرب لها من ظلالها
ماشافت عيوني من الناس غيرها ** ولاخلق رب الخلايق مثالها
أغلا بشر في جمله الناس كلهم ** وأكرم من ايدين المزون وهمالها
اتبع رضاها وارتجي زود قربها ** والي طلبته من حياتي وصالها
الصدق مرساها والأشواق بحرها ** والعطف وإحساس الغلا راس مالها
أهيم فيها وابتسم يوم قلبها ** يسال وأنا قلبي يجاوب سؤالها
وان أطلبتني شي فزييت مندفع ** أموت أنا واحمل تعبها بدالها
واصبر على الدنيا والأحزان والتعب ** واحمل على متني فطاحل جبالها
واسهر وأعذب راحة القلب بالشقى ** وأعيش أعاني بس يرتاح بالها
تربية أبوي ألي على الطيب بذكره ** اللي وهبني للحياة ومجالها
نور لي دروبي وأنا طفل مبتدي ** حتى تركني واحد من رجالها
الوالدين أولى بالإحسان لأجلهم ** وأولى بتكريم النفوس وعدالها
أقولها وأنا على الله متكل ** والله عليم بقدرتي واحتمالها
ياكلمة أغلا من النااااس كلهم ** ياشمس بقلبي بعيد زوالها
يافرحه تملي لي الكون بأكمله ** ياشجرة تكبر ويكبر ظلالها
تضحك لي الدنيا لاشفت زولها ** مثل السما تزهى بطله هلالها
والبعد عنها ياهل العرف ماقدره ** لاشك ناري زايده باشتعالها
ماعيش ببلاد ولاهي بأرضها ** ولابي عيوني كان ماهي قبالها
ارض تدوس أمي بالأقدام رملها ** أموت فيها واندفن في رمالها
الإثنين أغسطس 31, 2009 11:18 am
